‘Segregation’ sa basura mahigpit nang ipatutupad sa Maynila

MANILA, Philippines — Hihigpitan na ng pamahalaang lokal ng Maynila ang pagpapatupad sa “segregation” ng mga basura sa lungsod upang maiwasan ang pagbabaha at pagkakaroon ng sakit.

Ito ang tiniyak ni Manila Mayor Jospeh “Erap” Estrada bunsod na rin ng problema ng basurang kinakaharap ngayon ng lungsod.

Ayon kay Estrada, kung gagawin ng bawat bahay ang segregation o paghiwa-hiwalay, magiging maayos din ang sistema ng koleksiyon nito ng mga truck. Kailangan aniya  na magkaroon ng disiplina sa pagtatapon ng basura  upang maiwasan ang mga pagbaha at pagkakasakit. Nagtataka siya kung bakit sa ibang lungsod ay nagagawa ng mga residente ang segregation. Kailangan din umano na magmula sa mga barangay  officials ang pagtuturo at pakikipag-ugnayan sa mga residente ng kanilang nasasakupan.

Sinabi naman ni Department of Public Services chief Che Borromeo na  madalas ding pinaaalalahanan ang mga residente na hintayin ang oras ng dating ng truck  bago ilabas ang mga basura. Nagtatagal aniya ang paghahakot kung may mga basurang nakakalat sa daan na kailangan pang palahin.