MANILA, Philippines — Tumimbuwang noon din ang isang 30-anyos na ex-convict na may 2 taon nang nakalaya mula sa Ihawig Penal Colony nang pagbabarilin ng tatlong ‘di natukoy na mga suspek sa isang madilim na bahagi ng Parola Compound, sa Tondo, Maynila, kamakalawa ng gabi.
Sanhi ng mga punglong tinamo sa ulo at iba’t ibang bahagi ng katawan, dead-on-the-spot ang biktimang kinilalang si Junrey Sacro Basas, binata, residente ng Gate 16, Area-D, ng naturang lugar.
Sa ulat ng ManilaPolice District-Homicide Section, dakong alas- 8:00 ng gabi, habang naglalakad pauwi sa kanilang tahanan ang biktima sa isang madilim na eskinita na hindi alintana na nakabuntot sa kanya ang tatlong salarin ay bigla na lamang siyang pinagbabaril hanggang sa duguang bumulagta.
Patuloy pang inaalam ang motibo sa pamamaslang at ang pagkakakilanlan ng mga suspek.