MANILA, Philippines — Sugatan ang isang driver nang saksakin ng kapwa tricycle driver dahil sa agawan ng pasahero sa Tondo, Manila kamakalawa.
Inoobserbahan sa Jose Reyes Memorial Medical Center ang biktimang si Gilberto Canoza, 40, residente ng No. 2108 Molave St., Tondo bunsod ng tinamong saksak sa kaliwang tagiliran.
Nakapiit na sa Manila Police District-Station 7 ang suspek na si Edmund Sablaon, 36, ng No. 1027 Tayabas St., Tondo.
Sa ulat, dakong alas-4:45 ng madaling araw nang may dumating umanong pasahero na tinawag ng biktima at isinakay sa halip na sa suspek sumakay dahil nauna ito sa pila ng tricycle sa Molave St. Agad na sinita ng suspek ang biktima na nauwi sa pagtatalo, suntukan hanggang sa bumunot ng patalim ang suspek at sinaksak si Canoza sa kaliwang bahagi ng katawan. Sugatan din ang suspek dahil sa tinamong panununtok ng biktima sa kanyang ulo.
Agad na dinala sa ospital ang biktima habang ang suspek ay kalaboso at nahaharap sa kasong frustrated homicide.