MANILA, Philippines - Arestado ang isang 45-anyos na lalaki at ang menor-de-edad na anak na kapwa sangkot sa pagbebenta ng iligal na droga sa isinagawang buy-bust operation Sabado ng gabi, sa Caloocan City.
Isinailalim na sa inquest proceedings sa Caloocan City Prosecutors Office sa paglabag sa Section 5 (selling of illegal drugs), Section 16 (conspiracy) ng Republic Act 9165 ang mag-ama na kinilalang si Moreno Campos at isang di tinukoy na pangalan ng 17 -anyos na anak na lalaki, kapwa residente ng Little Baguio, Brgy. 180, North Caloocan.
Sa ulat ng Drug Enforcement Unit of Caloocan Police North Extension Office (NEO), dakong alas- 8:00 ng gabi ng Agosto 19 nang isagawa ang buy-bust operation laban sa mga suspek sa kanilang lugar.
Nakabili ang poseur-buyer ng shabu sa halagang P400 mula sa binatilyong anak ni Campos sa harapan ng kanilang bahay. Nang magkapalitan na ng shabu at marked money ay inaresto na ang menor-de-edad at mabilis na pinasok ng mga operatiba ang bahay nito.
Sa loob ng bahay ay naaktuhan pa ng mga operatiba ang pagre-repack ni Campos ng shabu at sinamsam ang nasa 12 heat-sealed plastic sachet ng shabu at mga gamit sa pagre-repack.
Kinuha kay Campos ang isang cellular phone at nakita sa palitan ng messages ang transaksiyon ni Campos sa isang alyas Niknik, na lumalabas na nagsusuplay ng shabu.