MANILA, Philippines - Muli na namang naabala ang mga pasahero ng Metro Rail Transit Line 3 (MRT-3) matapos apat na beses na tumirik ang mga tren nito kahapon.
Sa abiso ng pamunuan ng MRT-3, nabatid na unang napilitang magpababa ng mga pasahero ang isang tren ng MRT-3 dakong alas-5:52 ng madaling araw sa southbound ng Ortigas Station habang pagsapit ng alas-11:28 ng tanghali ay nagbaba muli ng mga pasahero ang isa pang tren nito sa southbound ng GMA Kamuning Station.
Ang ikatlong aberya naman ay naganap sa southbound ng Buendia Station dakong ala-1:56 ng hapon, kaya’t muli itong nagbaba ng mga pasahero.
Ayon sa MRT-3, pawang technical problem ang dahilan ng mga naturang aberya, na umabot sa Category 3 status, na nangangahulugang inalis ang mga tren sa linya nang walang kapalit.
Ang ika-apat na aberya ay naganap dakong alas-3:00 ng hapon sa pagitan ng Buendia at Ayala station southbound.