MANILA, Philippines - Isang suspected drug pusher, na sumuko sa ‘Oplan Tokhang’ ngunit hindi naman umano tumigil sa pagtutulak ng ilegal na droga, ang nasawi nang pagbabarilin ng tatlong di kilalang lalaki sa loob ng kanilang tahanan sa Brgy. Sto. Niño, Marikina City kamakalawa ng gabi.
Kinilala ang biktima na si Russel Jocson, 44, ng Narlugod St., sa Brgy. Sto. Niño, habang nakatakas naman ang mga di kilalang suspek matapos ang ginawang krimen.
Batay sa ulat ng Marikina City Police, dakong alas-8:50 ng gabi nang maganap ang krimen sa loob mismo ng tahanan ng biktima.
Kasalukuyan umanong nasa loob ng kanyang tahanan si Jocson nang pasukin ng tatlong di kilalang suspek at kaagad na pinagbabaril sa iba’t-ibang bahagi ng kanyang katawan at saka tumakas.
Hindi na naisugod pa sa pagamutan ang biktima dahil nalagutan na ito ng hininga.
Hinala naman ng pulisya na may kinalaman sa illegal na droga ang pagpatay ngunit patuloy pa rin nila itong iniimbestigahan upang matukoy ang pagkakakilanlan ng mga taong nasa likod nito.