MANILA, Philippines - Wasak ang mukha ng isang canteen helper matapos siyang saksakin ng balisong ng kanyang karibal sa mukha nang makita na kasama nito ang dating ka-live kamakalawa ng gabi sa Muntinlupa City.
Nilalapatan ng lunas sa isang pagamutan ang biktimang si Raffy Arindain, 22, binata, nakatira sa Block 6C, Purok 1, Brgy. Bayanan ng naturang lungsod.
Ang suspek na arestado at nakakulong sa Muntinlupa City Police detention cell ay kinilalang si Edgar Durante, 40 ng Munting Nayon, Brgy. Putatan ng naturang siyudad.
Batay sa ulat na natanggap ni Police Sr. Supt. Nicolas Salvador, hepe ng Muntinlupa City Police, naganap ang insidente alas-9:30 ng gabi sa harapan ng Amber Machine Shop sa kahabaan ng National Road, Brgy. Putatan.
Dito ay nakita ng suspek ang biktima na kasama ang dating live-in partner na si Marlyn Rodriguez, 28, isang kahera at sinugod ng saksak sa mukha.
Kahit na may tama ay nakatakbo ito at humingi ito ng tulong sa mga otoridad, na nagresulta nang pagkakadakip ng suspek.