Presyo ng LPG, tumaas

MANILA, Philippines – Nagpatupad na ng taas presyo  kahapon  ang ilang kompanya ng langis sa Liquefied Petroleum Gas (LPG) o cooking gas.

Ang LPG price hike ay pinangunahan ng Petron Corporation na nagtaas ng P3.80 kada kilo sa presyo ng Gasul at Fiesta Gas na katumbas ng P41.80 sa bawat 11 kilogram na tangke.

Tumaas din ng P2.15 kada litro  ang Auto LPG, na epektibo ito ng alas-6:00 ng umaga.

Ayon kay Raffy Ledesma,  ng Petron Corporation, ang  LPG price hike ay bunsod ng paggalaw ng presyo nito sa pandaigdigang pamilihan.

Inaasahang magpapatupad na rin ng pagtaas ang iba pang kompanya ng langis na may kahalintulad ding halaga.

Huling nagpatupad ng pagtaas sa presyo ng LPG ay noong Oktubre 1 ng taong kasalukuyan.