Sa Manila North Cemetery
MANILA, Philippines – Tiniyak ni Manila Mayor Joseph Estrada na maaari ring mailibing ang mga biktima ng Oplan Tokhang sa bagong tayong columbarium at apartment crypt sa Manila North Cemetery.
Ang paniniyak ay ginawa ni Estrada kung saan sinabi nito na walang diskriminasyon sa anumang serbisyo na binibigay ng pamahalaang lungsod sa mga Manilenyo, lalo na sa mga mahihirap.
“Basta taga-Maynila,” sagot ni Estrada nang tanungin kung maaari ring ilibing sa bagong pasilidad ang mga napaslang na drug suspects sa lungsod.
Nitong Lunes lang ay pinasinayaan ni Estrada ang bagong tayong P90-milyong columbarium at apartment crypt sa Manila North Cemetery, na aniya’y libreng magagamit ng mga taga-Maynila.
Sa patuloy na pagpapatupad ng Oplan Tokhang at Oplan Double Barrel ng Manila Police District, aabot na sa 200 ang napaslang na drug suspects habang nasa 10,000 libo na ang boluntaryong sumuko.
Sinimulan ang konstruksyon ng 5,000-square meter at apat na palapag na columbarium at crypt nito lang Pebrero. Ang columbarium ay may 4,088 na lagayan ng mga urns habang ang crypt naman ay kayang paglagyan ng 1,218 na kabaong.
Aminado si Estrada na punung-puno na ang Manila North Cemetery kaya naisipan na niyang magpatayo ng columbarium. (Doris Franche- Borja)