MANILA, Philippines – Bagamat ligtas na sa kamatayan, posibleng maging baldado ang isang 18-anyos na dalaga makaraang barilin ang magkabilang binti nito ng kaniyang dating nobyo, habang kasama ang bagong boyfriend sa loob ng kanilang bahay sa Tondo, Maynila, kamakalawa ng gabi.
Nilalapatan ng lunas sa Mary Johnston Hospital ang biktimang si Angel Laica Villoria, ng Zabala St. Tondo. Humarurot patakas ang suspek na sakay ng motorsiklo na kinilalang si Schan Vincent Suba, 18, ng Lico St., Tondo, Maynila.
Sa ulat ni SPO3 Paul Barbosa II, ng Manila Police District-station 2, naganap ang insidente pasado alas-11:00 ng gabi sa bahay ng biktima matapos umanong maghapunan ang biktima at ang bagong boyfriend na kinilala sa alyas na Christian nang biglang pumasok sa bahay ang suspek kung saan pinaputukan nito ang biktima.
Masuwerteng hindi tinamaan si Christian habang si Villoria ay nasapul sa mga binti. Tumakas ang suspek sakay umano ng motorsiklo habang ang sumaklolong mga kaanak ng biktima ang nagdala sa kanya sa pagamutan.
Selos ang umiral umano sa dating nobyo dahil ayaw nang makipagbalikan ng biktima at may bago na itong nobyo. Andrea Abello-Trainee