MANILA, Philippines – Utas ang isang traffic aide ng barangay makaraang pagbabarilin ng riding in tandem sa Caloocan City, kamakalawa ng gabi.
Isinugod pa sa Dr. Jose Rodriguez Memorial Hospital ngunit hindi na umabot ng buhay si Alfredo Valle, 52, traffic personnel ng Brgy. 178, ng naturang lungsod.
Sa ulat, sakay ng kanyang motorsiklo ang biktima dakong alas-6:30 ng gabi nang harangin ng isa ring motorsiklo sakay ang dalawang lalaki at agad na pagbabarilin ito.
Agad na tumakas ang mga salarin tungo sa direksyon ng Villa Imelda Street.
Ipinagtataka naman ng pulisya ang pagsusumite ng affidavit ng anak ng biktima na hindi na sila interesado na ituloy ang imbestigasyon sa krimen.