MANILA, Philippines - Dahil sa kolorum na ay nang-aagaw pa ng pasahero kung kaya’t isang tricycle driver ang pinagtataga ng samurai ng kanyang kapwa tsuper, kahapon ng umaga sa Makati City.
Nasa kritikal na kondisyon at halos maputol ang kaliwang braso habang ginagamot sa Saint Luke’s Hospital, Bonifacio Global City ang biktimang si Julius Jose, 26, ng Antipolo St., Brgy. Guadalupe Nuevo ng naturang lungsod.
Pinaghahanap pa ng pulisya ang suspek na si Erick Canlas, 34, ng nabanggit na barangay.
Lumalabas sa pagsisiyasat ni SPO2 Rico Caramat, ng Homicide Section, Makati City Police, naganap ang insidente alas-8:30 kahapon ng umaga sa Jervoice St., Brgy. Pinagkaisahan ng naturang siyudad.
Bago ang insidente, nabatid na legal na namamasada ang suspek sa naturang lugar, samantalang ang biktima naman ay kolorum na nakikipag-agawan pa sa pasahero.
Dahil dito, nagalit ang suspek at kinagabihan ay kinompronta ang biktima na humantong pa sa pag-aaway kaya sila dinala sa barangay.
Subalit, kinaumagahan muling namataan ng suspect ang biktima na namamasada kung kaya kinuha nito ang dalang samurai at pinagtataga ang huli saka mabilis na tumakas.