MANILA, Philippines – Isang 25-anyos na lalaking pasahero ang tumalon sa ikatlong palapag ng departure area ng Ninoy Aquino International Airport (NAIA) Terminal 3 matapos itong hindi pasakayin ng eroplanong papuntang Davao ng airline.
Sa naantalang ulat, kinilala ang pasahero na si Samuel Ambato, isang seaman, na pupunta sa Davao, at sasakay dapat ng eroplano ng AirAsia pero hindi pinayagan dahil sa di umano’y ‘questionable behavior’.
Ayon sa ulat, napansin ng mga taga-check-in counter ng Air Asia na masayang-masaya si Amberto habang papalapit ito sa airline counter pero bigla itong tumatawa ng malakas at nagulat ang mga nakakita dito ng bigla naman nag-iiyak kaya pinalalagay ng airline na may problema ang pasahero kaya hindi ito pinasakay ng eroplano.
Sa puntong ito biglang tumakbo ng mabilis si Ambato at tumalon sa 3rd floor ng gusali at bumagsak ito sa curbside malapit sa arrival bus station area.
Sabi sa ulat, nagtamo ng sugat sa ulo at bali ang paa ng biktima.
Samantala, mabilis na dinala si Amberto sa Pasay City General Hospital para malapatan ng kaukulang lunas.