MANILA, Philippines – Isang grade-3 pupil ang nagpakamatay sa pamamagitan nang pagbibigti matapos umanong sermunan ng kanyang guro, kamakalawa ng gabi sa Muntinlupa City.
Dead-on-arrival sa Alabang Medical Hospital si Rico Roda, 10-anyos, ng Phase 3, Block 45, Lot 51, Southville, Brgy. Poblacion ng naturang lungsod.
Lumalabas sa report na natanggap ni Senior. Supt. Allan Nobleza, hepe ng Muntinlupa City Police, alas-6:20 ng gabi nang umuwi ang biktima sa kanilang bahay at naabutan nito ang kanyang nakakatandang kapatid na si Rosemarie at ang boyfriend nitong si Maren. Ikinuwento ng nasawi sa kanyang ate at sa boyfriend nito, na pinagalitan siya ng kanyang teacher, gayunman hindi binanggit kung bakit.
Makalipas ang ilang minuto, napansin ni Rosemarie na kinakalas ng kanyang kapatid ang hawakan ng school bag nito at pinaglalaruan.
Ilang minuto pa ang nakakalipas, dumating ang isang Andy Perez sa bahay ng pamilya Roda at isinusumbong nito kay Rosemarie na ang kapatid nitong si Rico at ang kanyang anak ay nag-away.
Nang umalis si Perez, hinanap ni Rosemarie ang kapatid upang tanungin sa gulong kinasasangkutan nito, subalit ang biktima ay wala sa sala at maging sa kuwarto nito. Alas-7:00 kamakalawa ng gabi, nagbakasakali si Rosemarie na magtungo sa likod ng kanilang bahay para alamin kung nandoon ang kapatid.
Dito tumambad sa kanya ang nakabigting utol na ang ginamit ay ang hawakan ng bag nito. Dali-daling kinalag ni Rosemarie ang nakatali sa leeg ng kapatid at humingi ito ng tulong sa kanyang mga kapitbahay upang dalhin sa naturang ospital ang bata, subalit hindi na ito umabot pang buhay.
Hanggang sa ngayon ay iniimbestigahan pa ng pulisya ang insidente.