MANILA, Philippines – Patay ang isang pulis matapos itong pagbabarilin ng hindi pa nakikilalang suspek malapit sa bahay nito sa Caloocan City kamakalawa ng gabi.
Dead-on-the-spot ang biktimang si SPO1 Armando Garcia, 43, nakatalaga sa Police Community Precinct (PCP) 1, Caloocan City Police, residente ng Bgy. 142 Bagong Barrio ng nasabing lungsod. Nagtamo ito ng ilang tama ng bala sa katawan buhat sa kalibre 9mm baril.
Nagsasagawa pa ng follow-up ang Caloocan City Police sa motibo ng pagpatay at inaalam na rin ang pagkakakilanlan ng suspek.
Sa inisyal na pagsisiyasat ng pulisya, alas-9:30 ng gabi habang nakatayo ang biktima malapit sa bahay nito sa panulukan ng Panday Pira at Tirona Sts., Bgy. 166, Bagong Barrio nang lapitan ng suspek na nakasuot ng kulay berdeng baseball cup at may dalang shoulder bag na itim.
Biglang kinuha ng suspek ang baril mula sa dala nitong bag at malapitang pinagbabaril ang biktima na agad ding namatay.
Mabilis na tumakas ang suspek na sakay ng isang kulay itim na motorsiklo na hindi naplakahan.
Bubusisiin ng pulisya ang nakakabit na CCTV camera sa lugar dahil posibleng nakuhanan ang insidente.