MANILA, Philippines – Nagdulot ng mabigat na daloy ng trapiko sa mga motorista at commuters nang magliyab ang isang pampasaherong bus kahapon ng hapon sa may EDSA, Ayala flyover north-bound, Makati City.
Masuwerte namang walang nasugatan sa insidente dahil mabilis na nakababa ang mga pasahero bago pa man kumalat ang apoy.
Sa inisyal na report mula sa Metropolitan Manila Development Authority (MMDA) metro base, lumitaw na alas-4:45 ng hapon nang biglang magliyab ang likurang bahagi ng Manross Liner bus na may plakang UVB-618 na minamaneho umano ng isang nakilalang Michael.
Naging maagap naman ang pagresponde ng mga pamatay-sunog at alas-5:25 ay tuluyan na rin naapula ang apoy.
Patuloy pang iniimbestigahan ng mga awtoridad ang sanhi ng pagliyab.