MANILA, Philippines - Hawak na ngayon ng National Bureau of Investigation (NBI) ang isa pa sa itinuturong suspek sa pagpatay sa ina ng aktres na si Cherry Pie Picache.
Ito’y matapos na sumuko kahapon ng hapon sa NBI headquarters sa Maynila ang suspek na si Sherwin Ledesma.
Ayon kay Ledesma, siya ay kusang lumutang para linisin ang kanyang pangalan dahil wala umano siyang kinalaman sa nabanggit na krimen.
Wala umanong katotohanan ang pagsasangkot sa kanya ng nadakip na pangunahing suspect na si Michael Flores, na kasama siya sa panloloob sa bahay ng biktimang si Zenaida Sison.
Gayunman, aminado siya na kakilala niya si Flores pero wala siyang kinalaman sa krimen at sa katunayan, hindi rin niya alam na nagtatrabaho si Flores kay Sison.
Bukod sa nasorpresa siya sa pagdadawit sa kanya, nagalit din siya dahil sa walang katotohanan ang mabigat na paratang.
Isinasailalim si Ledesma sa interogasyon para sa determinasyon kung dapat siyang kasuhan gayunman, wala rin naman umanong matibay na batayan na sangkot siya sa panloloob.
Magugunitang matapos na maaresto si Flores ng mga tauhan ng QCPD at Sta. Rosa Police sa Sta. Rosa sa Laguna, inamin nito ang pagkakasangkot sa krimen.
Itinuro pa nito ang dalawang kasapakat na isa nga rito ay si Ledesma.
Binanggit din ni Flores na pagnanakaw lamang ang kanilang pakay at napatay lamang ang biktima nang magising ito at mahuli sila sa loob ng bahay.