MANILA, Philippines - Inaresto ang umano’y dalawang kilabot na holdaper nang makilala ito ng isang miyembro ng Manila Police District-Theft and Robbery Section, sa loob ng pampasaherong dyip, sa Sampaloc, Maynila, kahapon ng hapon.
Nakapiit sa MPD-TRS ang mga suspect na sina Frederuck Lumar, alyas “Boknoy” 32, may-asawa, miyembro ng Sigue-Sigue Sputnik Gang na residente ng Evangelista St., Quiapo at ang kasama nitong si Julius Cario, 22, residente ng Bocaue, Bulacan.
Sa ulat ni PO3 Jet Tajonera, dakong ala-1:00 ng hapon nang maispatan ni PO2 Margarito Dequito ang mga suspect na nasa loob ng isang pampasaherong dyip na may biyaheng Cubao-Quiapo, sa kahabaan ng España St., sa Sampaloc.
Habang sakay siya ng sariling kotse, sinundan niya ang nasabing pampasaherong dyip hanggang sa Lerma St. at hindi na hinintay pa na mangholdap ang dalawa at sinita niya ito at nakuhanan ng tig-isang patalim.
Aminado umano ang dalawa na plano pa lamang na mangholdap subalit nang makita si Dequito ay nakilala din nilang pulis ito.
Si Lumar ay ilang beses na umanong nasangkot sa kasong robbery at labas-masok na sa piitan.