MANILA, Philippines - Patay sa bugbog ang isang lalaki na natagpuan sa isang bakanteng lote sa Taguig City kahapon ng umaga.
Sa pamamagitan ng ID, nakilala ang biktima na si Apolonio Magundayao Jr, 30, naninirahan sa #30 Purok 2 MLQ St., Bgy. Bagumbayan, ng lungsod na ito.
Samantala, blangko pa ang pulisya kung sino ang mga taong responsable sa pagpatay sa biktima.
Base sa isinumiteng report ni Sr. Supt. Tomas Apolinario, hepe ng Taguig City Police, dakong alas-7 ng umaga nang matagpuan ang bangkay ng biktima sa bakanteng lote sa Bagong Silang Compound, Bgy. Hagonoy nang nasabing lungsod.
Lumalabas sa imbestigasyon ni SPO1 Darwin Allas, ng Station Investigation and Detective Management Section, ang bangkay ng biktima ay nadaanan lamang ng mga residente sa nasabing compound, na agad namang ipinagbigay-alam sa mga pulisya.
Nang suriin naman ng mga tauhan ng Scene of the Crime Operatives (SOCO) ng Southern Police District (SPD), nagtamo ng mga pasa at nagkabali-bali ang mga buto na hinihinalang dumanas ito ng matinding bugbog hanggang sa itinapon lamang sa nasabing lugar.
Patuloy naman nagsasagawa nang masusing imbestigayon ang mga awtoridad hinggil sa insidente. Samantala ang labi ng biktima ay pansamantalang inilagak sa Rizal Funeral Homes upang i-autopsy.