MANILA, Philippines — Tiniyak ni Sen. JV Ejercito na bubuhayin ang kanyang panukalang batas na nagtutulak sa mandatory na pagsasanay ng mga motorcycle riders sa gitna ng paglaganap ng tinatawag niyang “kamote” riders.
Pinuna ni Ejercito na dumarami na ang mga makukulit na nagmo-motor.
“Marami na ngayon ang tinatawag na kamote. Yan yung mga makukulit na nagmo-motor. Akala mo nangangarera lagi. Magulo sa kalye,” ani Ejercito.
Ginawa ni Ejercito ang pangako kasunod ng pagkamatay ng isang binatilyo sa isang “moto-tourism event” sa Bohol noong nakaraang linggo.
Sinabi ni Ejercito, na lumahok sa event, na sakay ng motorsiklo ang binatilyo nang bigla itong tumawid sa landas na nakalaan para sa moto-tourism event, dahilan upang mabangga siya ng isa sa mga kalahok.
Ang binatilyo, na walang suot na helmet ayon kay Ejercito, ay namatay isang araw matapos ang aksidente, habang ang rider na nakabangga sa kanya ay kailangang operahan dahil sa mga pinsala.
Naniniwala si Ejercito na maiiwasan sana ang mga aksidenteng tulad nito.
Nais ni Ejercito na ipatupad ang mandatory training bago makabili ng motorsiklo ang isang indibiduwal.
Subukan natin ang mandatory training, kung saan dapat may certificate ka para sa basic training at riding skill bago ka makabili ng motorsiklo. Siguro dapat unahin natin ito dahil dumarami ang motorcycle riders,” ani Ejercito.
Napaulat na sa datos na inilabas ng Land Transportation Office (LTO) ay mayroong humigit-kumulang 8.1 milyong motorsiklo sa bansa noong Disyembre 31, 2021.