MANILA, Philippines — Inilabas na ng Department of Budget and Management (DBM) ang may P5.2 bilyon para sa may 9.8 milyong mahihirap na benepisyaryo ng Targeted Cash Transfer Program.
Ito’y matapos aprubahan na ni Budget Secretary Amenah Pangandaman ang paglalabas ng Special Allotment Release Order (SARO) na aabot sa P5.2 billion para sa Department of Social Welfare Development (DSWD).
Ang nasabing halaga ay para sa ikatlong tranche ng Targeted Cash Transfer Program na kung saan, makikinabang dito ang nasa 9.8 million identified beneficiaries.
Sa ilalim ng TCT Program, P500 kada buwan ang matatanggap ng bawat beneficiary na tatagal ng hanggang anim na buwan.
Kaugnay nitoy sinabi ni Pangandaman na mahigpit ang bilin mismo ni Pangulong Ferdinand R. Marcos Jr. na huwag pabayaan ang mga nangangailangan at gagawin ng pamahalaan ang lahat upang patuloy na makatanggap ng naturang benepisyo ang mga karapat-dapat na makatanggap nito.