Pinsala ni Karding sa agri, higit P3 bilyon na
MANILA, Philippines — Pumalo na sa mahigit P3 bilyon ang iniwang pinsala ni supertyphoon Karding sa sektor ng agrikultura.
Sa report ng National Disaster Risk Reduction and Management Council (NDRRMC) nitong Sabado, tumaas na sa P3,076,968,120.04 ang pinsala ni Karding sa agrikultura habang nasa P14,141,725 naman sa livestock, poultry at pangisdaan.
Nairekord naman sa104,500.90 magsasaka at mangingisda ang naapektuhan habang 166,630.11 hektarya ng mga pananim ang nasalanta.
Inulat din ng NDRRMC, na nasa 247,016 pamilya o kabuang 913,893 indibiduwal ang naapektuhan ng bagyo sa pitong rehiyon habang nasa 47,388 ang nasira ang mga tahanan.Karamihan sa mga ito ay nanuluyan sa mga evacuation centers habang ang iba naman ay sa kanilang mga kamag-anak sa mga matataas at ligtas na lugar.
Nasa kabuuan namang 57,080 mga bahay at 43 imprastraktura ang napinsala ng bagyo.
Magugunita na Setyembre 25 nang hagupitin ni supertyphoon Karding ang Luzon kung saan pinakagrabeng naapektuhan ang Quezon.
Nagkaroon din ng matinding flashflood sa Bulacan kung saan nagbuwis ng buhay ang apat na rescuer sa bayan ng San Miguel matapos na mabagsakan ng gumuhong pader ang sinasakyan ng mga itong bangka sa kasagsagan ng pananalasa ni Karding.
Nanatili naman sa 12 katao ang death toll ng bagyo, 52 ang nasugatan at anim na mangingisda ang nawawala.
- Latest