MANILA, Philippines — Nakapagtala ang Pili-pinas ng 28,008 bagong kaso ng COVID-19 sa loob ng isang linggo, mula Agosto 8 hanggang sa 14, ayon sa Department of Health (DOH) kahapon.
Batay sa National COVID-19 case bulletin na inilabas ng DOH nitong Lunes, mayroong average na 4,001 kaso na naitatala kada araw sa nakalipas na linggo.
Mas mataas ito ng 3% kumpara sa mga kasong naitala mula Agosto 1 hanggang Agosto 7.
Nasa 101 kaso ang nasa ‘severe at critical’ na kundisyon. Nasa 229 ang bagong nadagdag sa mga nasawi kung saan 98 lamang dito ang nangyari mula Agosto 4 hanggang Agosto 14.
Sa healthcare utilization, nakapagtala ng 30.9% ‘non-ICU bed utilization’ kung saan 6,781 sa 21,968 na higaan ang okupado. Nasa 28% naman ang ‘ICU bed utilization’ kung saan 719 sa 2,571 higaan ang okupado ng mga pasyente.
Nakapagtala na rin ng 92.33% ‘coverage ng target population’ ang ‘fully-vaccinated’ na. Katumbas ito ng 72,107,000 bakunado makaraang madagdagan ng 208,369 na nagpabakuna noong nakalipas na linggo.
Nasa 17,015,413 naman ang nakapagpatu- rok ng unang booster shot makaraang madagdagan ng 412,316 nitong nakaraang linggo.