Mga korap ibubunyag
MANILA, Philippines — Nagbanta si Pangulong Rodrigo Duterte na ibubunyag niya bago mag-eleksiyon kung sino sa mga kumakandidatong pangulo ng bansa ang korap.
“But I’d like to start talking about elections and candidates in due time. Siguro mga…mga last month of --- I will personally name the candidates and maybe what’s wrong with them na kailangan malaman ng tao because you are electing a president,” banta ng Pangulo.
Ayon kay Duterte, mahalagang malaman ang totoo at bahala na ang mga mamamayan kung maniniwala sa kanya o hindi.
Bilang Pangulo ay nakukuha umano niya ang lahat ng impormasyon at nakikita rin niya sa pamamagitan nang pagmamatyag.
Alam anya ng mga kandidato kung sino ang kaniyang tinutukoy at sa hanay ng mga ito ay mayroong hindi talaga dapat maging pangulo at mayroon din na masyadong corrupt.
Idinagdag din ni Duterte na may kandidato umano na akala ng mga tao ay malinis pero inirereklamo umano kahit ng mga Chinese dahil sa korapsiyon.
“Mayroon diyan…. --- talagang hindi puwedeng maging presidente. Mayroon naman diyan na presidente pero masyadong corrupt. Akala lang kasi ng mga tao malinis pero ‘yung mga --- mga nag-transact sa business sa kanya, official business, pati ‘yung mga Chinese nagreklamo na na masyadong corrupt daw,” sabi ni Duterte.