MANILA, Philippines — Suportado ng Department of National Defense (DND) ang mandatory military training ng mga 18-anyos na Filipino na magbibigay ng maraming benepisyo sa mga kabataan.
Ayon kay Defense Secretary Delfin Lorenzana, kabilang dito ang pagkakaroon ng reservists ng militar na handa at naisanay upang depensahan ang bansa.
Sa pamamagitan din ng training at disiplina, mas magiging mabuting mamamayan ang mga ito at maitatanim sa kanila ang pagseserbisyo sa bansa.
Gayunman, inamin ni Lorenzana na may ilang mararanasang hadlang sa implementasyon nito kabilang na ang resources.
Kakailanganin aniya ng training camps sa buong bansa, manpower, at pondo para ma-accommodate ang milyun-milyong Filipino na aabot sa 18 taong gulang.
Hindi rin inaalis ni Lorenzana ang posibilidad na may ilang tumutol na magserbisyo sa militar.
Bunsod nito, mas mabuting alternatibo aniya ang implementasyon ng mandatory ROTC sa mga pribado at pampublikong paaralan.
Sinisimulan na aniya ang implementasyon nito sa State Universities and Colleges (SUCs).
Target ng programa ang K11-K12 levels na magiging reservist.
Una rito, sinabi ni Davao City Mayor at vice presidential candidate Sara Duterte-Carpio na sakaling palaring magwagi sa May 2022 elections ay isusulong niya ang mandatory military service para sa lahat ng mga Pilipinong 18-anyos.— Joy Cantos