MANILA, Philippines — Isinusulong ni Deputy Majority Leader at 4thDistrict Quezon City Rep. Jesus “Bong” Suntay na gamitin ang mga hotel na pansamantalang huminto muna ng operasyon dulot ng pandemya bilang quarantine facilities sa mga mild na kaso ng COVID-19.
Ayon kay Suntay, punuan na sa mga ospital habang halos kinukulang na rin ang mga quarantine facility na inilaan ng gobyerno at maging ng mga Local Government Units (LGUs).
Binigyang diin ng solon na sa ilalim ng Republic Act 11494 o ang Bayanihan to Heal As One Act, maaaring pansamantalang i-takeover ng estado ang nasabing mga pasilidad sa panahon ng national emergency.
Idinagdag pa ni Suntay na maging ang Philippine College of Physicians ay umaapela kay Pangulong Duterte na ipagamit ang mga hotel sa Metro Manila upang mabawasan ang siksikan ng mga pasyenteng may COVID sa mga ospital.