MANILA, Philippines — Inaasahang darating sa Marso 21 ang isang milyong dose ng Sinovac vaccine na binili ng bansa.
Ayon kay vaccine czar Carlito Galvez Jr., ang isang milyong bakuna ay bukod pa sa panibagong ibibigay ng China na 400,000 dose na inaasahan din ngayong Marso.
“So 1.4 million ang darating this March,” sabi ni Galvez.
Una nang nakatanggap ng 600,000 dose ng Sinovac ang Pillipinas mula sa China nitong Pebrero 28.
Habang kahapon naman ay dumating ang karagdagang 38,400 dose ng AstraZeneca mula sa COVAC facility. Nauna ng idineliber noong Marso 4 ang 487,000 dose nito.
Idinagdag pa ni Galvez na 4.5 milyong dose ng AstraZeneca ang parating sa bansa hanggang Mayo kung saan makakatanggap ng 1.5 milyong dose kada buwan.