MANILA, Philippines — May 2.5 milyong manggagawa ang pansamantala o permanenteng nawalan ng trabaho dahil sa COVID-19.
Sinabi ni Labor and Employment Secretary Silvestre Bello III na maaaring tumaas pa ang naturang bilang kapag hindi nakapagpatupad ng mga flexible arrangement ang mga negosyo.
“Itong figure natin baka lolobo pa ‘yan, kaya ang dapat natin gawin ngayon ay gumawa tayo ng mga advisory, sa mga employers at business establishments para mag adopt ng iba’t-ibang klaseng arrangements para mabawasan ang pagtatanggal o pagsasara,” giit pa ni Bello.
Naunang ipinahayag ni Finance Secretary Carlos Dominguez na 1.2 hanggang 1.5 milyong trabaho ang pansamantalang nawala dahil sa pandemic.
Sinabi rin ni Bello na ang mga kumpanyang nawawalan ng pera dahil sa COVID-19 ay maaaring magbigay sa kanilang mga empleyado ng temporary suspension, limitahan ang oras ng trabaho o magpatupad ng rotating schedules para maiwasan ang retrenchment.
Nauna ring inilunsad ng DOLE ang isang cash aid program para sa mga local at overseas Filipino worker na nawalan ng trabaho dahil sa COVID-19. Gayunman, mabilis na nauubos ang pondo dahil sa napakaraming bilang ng mga benepisyaryo, ayon sa kalihim.