MANILA, Philippines — Isinusulong ngayon ni Sen. Sherwin Gatchalian ang panukalang batas na layong ipagbawal ang mga abusadong paraan ng paniningil ng utang lalo na ang pananakot at pamamahiya.
Sa Senate Bill No. 1336 o ang “Fair Debt Collection Practices Act,” ni Gatchalian, nais nitong ipagbawal ang “paggamit ng ‘di makatarungan, mapanlinlang at abusadong pangongolekta at paniningil ng utang.”
Ito’y bunsod ng mga reklamo ng pamamahiya o pananakot sa mga hindi pa makabayad, lalo na sa social media, aniya.
“Layunin ng panukalang batas na ito ang pagtanggal ng abusado at hindi makatarungang pangongolekta ng debt collectors ng utang laban sa mga kababayan nating nangangailangan,” ani Gatchalian sa isang pahayag.
Aniya, “sinisiguro rin ng naturang panukalang batas na maprotektahan naman ang mga debt collector na hindi nang-aabuso.”
Sa ilalim ng panukala, bawal ang sino mang debt collector na “mang-harass o mang-api” ng mga may utang. Bawal din ang “paggamit ng mapanlinlang na representasyon o pamamaraan ng pangongolekta ng utang.”
Layunin din ng panukala na masiguro na confidential at hindi maisisiwalat sa publiko ang impormasyon ng mga may utang ng walang pahintulot.
Aabot sa P30,000 ang maaring maximum na multa sa mga lalabag.