MANILA, Philippines — Pinangalanan ni Pangulong Rodrigo Duterte ang "anti-graft czar" na si Dante Jimenez bilang bagong co-chairperson ng Inter-Agency Committee on Anti-Illegal Drugs, Biyernes.
Bago ilipat sa ICAD, matatandaang itinalaga ni Duterte si Jimenez bilang chairperson ng Presidential Anti-Corruptiopn Commission noong 2018.
Si Jimenez ang kukuha sa posisyong iniwan ni Bise Presidente Leni Robredo.
Before being named to the ICAD, Dante Jimenez has been the chairman of the Presidential Anti-Corruption Commission since 2018. pic.twitter.com/Gq8qi3c9y1
— ONE News PH (@onenewsph) February 28, 2020
Makakatuwang ni Jimenez si Philippine Drug Enforcement Agency director general Aaon Aquino sa bagong trabaho, na siya ring chairperson ng ICAD.
Kilala ang bagong opisyal bilang isa sa mga pinuno ng Volunteers Against Crime and Corruption, na dati nang nananawagan para maipanumbalik ang parusang kamatayan.
Pagtanggal kay Robredo
Matatandaang tinanggal bilang pinuno ng ICAD si Robredo, na kilalang kritiko ng madugong "war on drugs" ni Duterte, noong Nobyembre.
Tumagal lamang ng ilang linggo ang ikalawang pangulo sa pwesto.
Tinanggap noon ni Robredo ang pagiging co-chair kahit na hindi siya sang-ayon sa pamamaraan ng administrasyon kaugnay ng pagsugpo ng droga.
"[K]ung mayroon akong maililigtas na kahit isang inosenteng buhay, ang sinasabi ng prinsipyo at puso ko ay kailangan ko itong subukan," sabi niya nang kunin ang alok.
Matapos ang kanyang termino, lumabas na 44% lang ng mga Pilipino ang kuntento sa kanyang naging trabaho, ayon sa survey ng Social Weather Stations.
Bagama't wala pa ito sa kalahati ng populasyon, 26% lang ang nagsabing hindi sila nasiyahan sa kanyang ginawa habang 30% ang undecided. — may mga ulat mula sa ONE News