3 Antipolo ninja cops dinismis na!
MANILA,Philippines — Dinismis na sa serbisyo ang tatlong “ninja cops” na nasangkot sa kontrobersyal na anti-illegal drug operation sa Antipolo City, Rizal noong Mayo ng taong ito.
Sa press briefing, sinabi ni Philippine National Police (PNP) Officer-in-Charge Lt. Gen. Archie Gamboa na nilagdaan na niya ang dismissal order laban sa mga pulis na nasangkot sa maanomalyang drug raid.
Kinilala ang mga pinatalsik sa serbisyo na sina Master Sergeant Donald Roque, Master Sergeant Rommel Vital at Corporal Romeo Guerrero.
Ang tatlo kasama si Police Lt. Joven de Guzman ay inirekomendang madismis sa serbisyo ng PNP-Internal Affairs Service (PNP-IAS) kaugnay ng Antipolo City drug raid na nagsimula sa panghaharang ng nasabing mga pasaway na parak sa isang motorista sa checkpoint sa lungsod noong Mayo ng taong ito.
Ang biktima ay pinaharurot ang behikulo matapos itong umiwas sa checkpoint kung saan ay sinundan ito ng grupo ng nasabing mga pulis na ni-raid ang bahay ng nasabing motorista.
Kaugnay nito , pinatawan ni Gamboa si de Guzman ng 59 araw na pagkakasuspinde bunga ng kontrobersyal na isyu.
Nabatid na ang apat na pulis na itinalaga sa Antipolo City ay galing sa Mindanao matapos na hilingin ng Prosecutor’s Office ng Pampanga na maibalik ang mga ito upang madaling maiprisinta sa korte sa paglilitis ng mga kasong kanilang kinakaharap.
Sa rekord, nabatid na sina Roque, Vital at Guerrero ay nasangkot din sa anti-illegal drug raid noong Nobyembre 2013 sa Pampanga kung saan naganap ang drug recycling sa Mexico, Pampanga nang panahong iyon.
- Latest