LPA ganap nang isang bagyo
MANILA, Philippines — Isa na ngayong ganap na bagyo na tinawag na bagyong Ineng ang isang low pressure area na nasa Virac, Catanduanes.
Alas-11:00 ng umaga kahapon, ang bagyong Ineng ay namataan ng Philippine Atmospheric Geophysical and Astronomical Services Administration sa layong 930 kilometro ng silangan ng Virac habang patuloy ang pagkilos sa may kanluran hilagang kanluran sa bilis na 15 kilometro bawat oras.
Taglay ni Ineng ang lakas ng hangin na umaabot sa 55 kilometro bawat oras malapit sa gitna at may pagbugso ng hangin na umaabot sa 70 kilometro bawat oras.
Si Ineng ay magdudulot ng kalat-kalat na mahina hanggang sa katamtamang pag-ulan na minsa’y malakas na ulan sa buong Bicol Region at Eastern Visayas.
Ngayong Huwebes ng gabi, si Ineng ay inaasahang nasa layong 720 kilometro ng silangan ng Tuguegarao City, Cagayan at sa Biyernes ay inaasahang nasa layong 330 kilometro ng silangan ng Basco, Batanes at sa Sabado ng gabi ay inaasahang nasa 265 kilometro ng hilaga ng Basco.
Inaasahang lalabas sa ating bansa si Ineng sa Linggo ng gabi.
- Latest