MANILA, Philippines — Ipinaalala kahapon ni Senate President Vicente “Tito” Sotto III sa mga kasamahan sa Senado na ang trabaho nila ay gumawa ng batas at hindi sila mga prosecutors at judges.
Sa kanyang talumpati matapos muling mahalal bilang lider ng Senado, ipinunto ni Sotto na bilang mga mambabatas, ang trabaho nila ay maghain ng panukala, magdebate tungkol dito at ipasa sa Pangulo upang maging batas.
Pero ang nangyayari aniya ay nasasagawa sila ng mga pagdinig na nagdudulot ng high blood pressures, heart attacks, strokes at self-injury.
Ipinaalala rin ni Sotto na dapat silang maghinay-hinay sa mga iniimbitahan nila sa mga pagdinig dahil mayroon ding Constitution rights ang mga ito.
Nilinaw ni Sotto na hindi niya nais palambutin ang kanilang kapangyarihan. Pero nais niyang matiyak na ang mga gagawing pagdinig ay para lamang sa paggawa ng batas.
Pero naniniwala rin si Sotto na dapat ikulong sa Senado ang mga sinungaling na testigo o mga resource persons.