MANILA, Philippines — Bukas ang pamahalaan ng Pilipinas na putulin ang diplomatikong relasyon nito sa Iceland makaraang isampa ng huli sa United Nations Human Rights Council ang isang resolusyong humihiling ng imbestigasyon sa anti-drug war sa bansa.
Ang Iceland at 17 iba pang bansa ay bumotong pabor sa pagpapatibay ng resolusyong nagmamandato sa konseho na repasuhin ang sitwasyon ng karapatang pantao sa Pilipinas.
Inakusahan ni Presidential spokesperson Salvador Panelo ang Iceland ng panghihimasok sa soberanya ng Pilipinas sa naturang deklarasyon.
Sa pagbanggit na walang embahada ang Pilipinas sa Iceland, sinabi ni Panelo na ikokonsidera ng pamahalaan ang sitwasyon ng mga manggagawang Pilipino sa Nordic island country sa desisyon nito.
Pero sinabi ni Panelo na nasa desisyon na nina Foreign Affairs Secretary Teodoro Locsin Jr. at Pangulong Rodrigo Duterte kung puputulin na ang relasyong diplomatiko sa Iceland.
“Hahayaan natin ang ating Pangulo na magbigay ng kanyang pinal na hatol sa mga panawagan na putulin na natin ang ating pakikipag-ugnayan sa isang bansa kagaya ng Iceland,” wika ni Panelo.