MANILA, Philippines — Nilagdaan na ni Pangulong Rodrigo Duterte ang panukalang batas na magpapalawak at mag i-institutionalize sa ibinibigay na diskuwento sa pamasahe ng mga estudyante.
Sakop ng Republic Act 11314 o “Student Fare Discount Act” ang lahat ng uri ng transportasyon katulad jeep, bus, UV Express vans, taxi at TNVS kasama rin ang eroplano, barko, MRT, LRT at PNR.
Ayon kay Senator Sonny Angara, awtor ng panukala, makikinabang sa bagong batas ang nasa 30 milyong estudyante.
Kailangan lamang na ipakita ng mga estudyante ang kanilang valid na school ID na magpapatunay na siya ay naka-enroll.
Idinagdag ni Angara na ang diskuwento ay ibibigay sa buong taon kahit holidays.
Hindi naman kasama sa batas ang mga indibiduwal na naka-enroll sa mga dancing o driving schools, short-term courses para mag seminar, at mga post-graduate studies katulad ng medicine, law, masters at doctorate degrees.