MANILA, Philippines — May 13 pasaherong Pilipino na papuntang Hong Kong ang nasabat ng mga opisyal ng Bureau of Immigration sa Ninoy Aquino International Airport makaraang mahuling gumagamit ng mga pekeng boarding pass.
Ayon kay BI Port Operation Division Chief Grifton Medina, pitong lalake at anim na babae ang naharang noong Lunes sa NAIA Terminal 3 makaraang matuklasan ng mga tauhan ng Cathay Pacific na ang self-printed boarding pass ng mga ito ay wala sa manifest at hindi mga issued ticket ng airline.
“Parang biktima sila ng scammer na bumibiktima sa publiko sa pagbebenta ng pekeng tiket sa murang presyo para maengganyo ang biktima,” ani Medina.
Sa airport lang anya nalaman ng mga pasahero na naloko sila nang sabihan sila ng airline na ang kanilang boarding pass ay hindi naka-encoded sa kanilang system. Ayon sa mga pasahero, isa sa kanilang kasamang babae ang humimok sa kanila na bilhin ang plane ticket.
Pero ikinatwiran ng babae na hindi niya alam na peke ang mga boarding pass dahil ibinigay lang ito sa kanya ng isang Jennifer na tatlong beses pa lang niya nakita at sinabihan lang siya na ibigay ang mga tiket sa kanyang mga kasamahan.