MANILA, Philippines — Hindi pinayagang makapasok sa Hong Kong si dating Foreign Affairs Secretary Albert del Rosario, kahapon ng umaga.
Si del Rosario, na nanguna sa maritime arbitration case laban sa China noong 2013, at nagreklamo sa International Criminal Court (ICC) nitong Marso laban kay Chinese President Xi Jinping, ay nadetine nang 6 na oras ng immigration officials ng Hong Kong, na special administrative region ng China.
Matapos ang pagtatanong sa kanya ay pinabalik na rin ng Pilipinas ang dating cabinet official.
Sinabi ni del Rosario na may business meeting siya sa Hong Kong at ginamit ang kanyang diplomatic passport para hindi na pumila ngunit ipiniit pa rin siya sa loob ng immigration office.
“Denied entry without explanation. With diplomatic passport, this would be in violation of Vienna convention,” dagdag nito.
Nakasaad sa Vienna Convention ang paggalang ng mga bansa sa mga diplomat mula sa mga bumibisitang bansa, pati na rin sa pamilya ng mga ito.
Pero hindi raw kinilala ng Hong Kong Immigration ang hawak ni del Rosario na diplomatic passport.
Wala rin aniyang ibinigay na pahayag sa kaniya ang mga awtoridad ng Hong Kong kung bakit siya pinabalik ng Pilipinas matapos ang anim na oras na interogasyon at paghihintay.
Itinanggi naman ni Philippine Consul General Antonio Morales na inilagay sa isang “holding area” si del Rosario. Sinabi niya na parang normal na biyahero lamang si del Rosario at nagtatagal ang usad sa immigration.
Una nang nakaranas ng sinasabing harassment si dating Ombudsman Conchita Carpio-Morales na hindi pinayagang makapasok sa Hong Kong nitong nakaraang Mayo. Ang dalawa ay ang nagsampa ng kaso laban kay Chinese President Xi Jinping ng “crimes against humanity”.
Iginiit naman ni Presidential Spokesman Salvador Panelo na wala sa posisyon ang Pilipinas para kuwestiyunin ang naging hakbang ng HK immigration para harangin sa kanilang teritoryo si del Rosario.
Ayon kay Panelo, nasa hurisdiksyon ng HK authorities kung ayaw nitong papasukin ang isang dayuhan sa kanilang teritoryo.
Nasa mga otoridad ng HK ang pagpapasya kung security risk ang isang indibidwal na pumapasok sa kanila at kahit diplomatic passport pa ang bitbit nito basta’t sinabi ng kanilang immigration na hindi maaaring papasukin ay wala anya tayong magagawa.
Sinabi rin ng itinalagang officer in charge ng Malacañang na si Justice Sec. Menardo Guevarra na dapat natututo na si del Rosario sa sinapit ni Morales ng harangin ito sa HK international airport.