MANILA, Philippines — Tinukso ni Pangulong Duterte si Vice Pres. Leni Robredo nang dumalo at magkita sila sa graduation ceremony ng Philippine Military Academy ‘Mabalasik’ Class 2019 sa Fort del Pilar, Baguio City kahapon.
Iyon ang unang pagkikita nila mula nang idawit siya sa umano’y planong pagpapabagsak sa administrasyong Duterte at makaraang matalo ang oposisyon sa nagdaang halalan.
Sa simula ng kanyang talumpati, biniro ni Pangulong Duterte si Robredo dahil hindi na siya nito nginingitian.
“Vice President Maria Leonor ‘Leni’ Robredo, ma’m, bakit noon ma’m naga-smile ka sa akin, ngayon hindi na? Ikaw ha,” sabi ni Duterte na nagpatawa sa mga audience.
Pagkatapos ng kanyang 13 minutong talumpati, nakitang nakikipagkamay si Duterte sa nakangiti nang si Robredo.
Nauna rito, ibinunyag ng narrator ng anti-Duterte “Ito ang totoong Narcolist” video na si Peter Joemel Advincula alyas Bikoy na ang oposisyon na kinabibilangan ni Sen. Antonio Trillanes at ng Liberal Party na pinamumunuan ni Robredo ang may pakana sa video para patalsikin sa puwesto ang Pangulo. Mariing pinabulaanan ni Robredo ang akusasyon.