MANILA, Philippines — Pinamamadali ng Integrated Bar of the Philippines (IBP) sa Korte Suprema ang imbestigasyon sa mga kaso ng pagpatay sa mga abogado sa ilalim ng administrasyong Duterte.
Ito ay kasunod pa rin ng ambush na ikinasawi ni Rep. Rodel Batocabe ng Ako Bicol Party-list.
Lumagda ng petisyon ang halos 100 miyembro ng IBP na kumakalampag sa Kataas-taasang Hukuman para aksyunan ng patas ang nakababahala umanong insidente ng pagpatay sa mga abogado.
Kung maaalala, nasawi rin kamakailan ang abogado ng Sagay massacre na si Atty. Benjamin Ramos.
Habang nakaligtas sa pananambang ang isang Atty. Erfe del Castillo sa Negros Oriental.
Sa datos ng National Union of People’s Lawyers, ika-35 na si Batocabe sa mga abogadong napatay sa ilalim ng kasalukuyang administrasyon.