MANILA, Philippines — Niratipikahan na kahapon ng Senado ang panukalang Universal Health Care (UHC) Bill.
Layunin ng panukala na magkaroon ng 100% coverage sa mga health care services ang lahat ng Filipino.
Inaasahang ipapadala na sa Malacañang ang panukala para malagdaan ni Pangulong Duterte.
Nauna ng sinertipikahang “urgent” ng Pangulo ang panukala kaya tiyak na lalagdaan niya ito.
Sinabi ni Sen. JV Ejercito na hindi na magiging problema kahit sa mga mahihirap ang magpagamot dahil sasagutin ito ng PhilHealth.
“Bata, matanda, babae, lalaki, miyembro ng LGBT community, PWD, kahit sino basta Pilipino, sa ilalim ng UHC, alalay ang gobyerno sa gastos kapag sila ay nagkasakit,” sabi ni Ejercito.
Kapag nalagdaan na ng Pangulo, ang lahat ng Pinoy ay awtomatikong magkakaroon ng PhilHealth coverage at hindi na mangangailangan pa ng PhilHealth ID.