MANILA, Philippines — Personal na nagpaabot ng pasasalamat si Pangulong Duterte sa Japan kaugnay ng naging tulong sa Pilipinas nang manalasa ang bagyong Ompong sa bansa nitong nagdaang Setyembre.
Pinuri rin ng Pangulo ang Japan sa kakayahan nitong mabilis na makarekober sa mga pinsalang dulot ng kalamidad at isang halimbawa rito ay nang tumama ang bagyong Jebi.
Inihayag ni Pangulong Duterte na sa harap ng pagiging malapit sa peligro ng mga bansang nasa Southeast Asia dahil sa mga natural disasters bunga ng climate change, makakatulong ang Japan sa Association of Southeast Asian Nations (ASEAN) countries sa pamamagitan ng pamamahagi nito ng kanilang expertise hinggil sa mabilis na pagbangon pagkaraan ng mga delubyo.
Pinuri rin ni Pangulong Duterte ang Fukuda Doctrine na hanggang ngayon ay nakikita ang epekto sa iba’t ibang sectoral bodies ng ASEAN gaya ng human resource development and policy, public health, labor, social welfare at media information literacy.
Samantala, nasa Papua New Guinea na ang Pangulo upang dumalo naman sa APEC summit mula ?Nov. 17-18 matapos itong dumalo sa 33rd ASEAN Summit sa Singapore.