MANILA, Philippines — Isang panibagong Low Pressure Area (LPA) na naman ang namataan ng PAGASA na papasok sa Pacific coast ng Pilipinas.
Ayon kay Gener Quitlong, meteorologist ng PAGASA, ang LPA ay namataan may 2,300 kilometro ang layo mula sa Mindanao at inaasahang papasok sa Philippine Area of Responsibility (PAR) ngayong Biyernes ng gabi o Sabado ng umaga.
Inaasahang pagsapit ng Linggo o Lunes ay maging ganap na itong bagyo, na papangalanang Paeng.
Posible naman umanong hindi mag-landfall o tumama sa kalupaan ang bagyo, ngunit maaaring lumapit ito sa area ng Batanes at palakasin ang habagat, na maaaring magdulot ng mga pag-ulan sa lugar.
Noong nakaraang weekend ay nanalasa sa Luzon ang bagyong Ompong, na siyang itinuturing na pinakamalakas na bagyong tumama sa bansa ngayong taon.