MANILA, Philippines — Pinag-aaralan na ng House Committee on Transportation na gawing criminal offense ang pagpili at pagtanggi sa mga pasahero ng mga driver ng Transportation Network Vehicles (TNVs) tulad ng Grab at mga taxi.
Ayon kay committee vice chairman Edgar Mary Sarmiento, isa ito sa kanilang mga ikokonsidera kung talagang dapat bang patawan ng parusang kriminal ang isang Grab driver o taxi driver na tumatanggi at namimili ng isasakay na pasahero.
Ito ay dahil alam ng kongresista ang maraming problemang dumarating sa kanilang komite sa kabila ng ilang paghihigpit sa Grab.
Sa ngayon umano ay nasa unang pagdinig pa lamang sila sa pagrereview ng TNVs.
Bukod dito pinag-aaralan na rin ng komite ang iba`t ibang model at dynamics ng mga TNVs ng ibang mga bansa para ma-adopt ito sa Pilipinas.
Layunin ng paglikha ng batas sa TNVs na maging compliant ang Grab at ang iba pang ride-hailing firm sa pagbibigay ng maayos na serbisyo at convenience sa mga pasahero.