MANILA, Philippines — Pinag-aaralan ngayon ni Tourism Sec. Wanda Teo ang pagkuha ng mga overseas Filipino workers bilang mga interpreter at tour guide dito sa bansa.
Sinabi ni Teo, kailangan ng Department of Tourism (DOT) ang mga OFWs na matatapos ang kontrata para maging interpreter dahil tiyak naman aniyang natutunan na ng mga ito ang lengguwahe ng bansang kanilang pinagtrabahuan.
Ayon kay Sec. Teo, nakausap na niya si Labor Sec. Silvestre Bello III para maplantsa ang mga kailangang guidelines para sa naturang proyekto.
Partikular na tinukoy ni Teo ang pangangailangan ng DOT sa mga OFW galing sa South Korea, China at maging Vietnam, dahil ito ang mga bansang may pinakamaraming turista pero kulang sila sa mga marurunong magsalita ng kanilang wika.
Binigyang-diin ni Teo na magandang panghikayat ito sa OFWs na manatili na lang sa bansa dahil may mga oportunidad para sa kanila.
Maaari rin aniyang maging part-time ito ng mga OFW na natapos ang kontrata dahil puwede silang kumita habang nagbabakasyon sa bansa.
Ipinagmalaki ni Teo na patuloy sa pagtaas ang bilang ng mga lokal at dayuhang turista sa bansa.