MANILA, Philippines — Sinimulan na ng mga elemento ng Department of Environment and Natural Resources (DENR) ang pagbabaklas sa mga illegal structures sa Boracay Island sa Aklan.
Isa sa nasampolan ang viewing deck na nakatayo sa isang rock formation sa isang resort na pag-aari ng isang Crisostomo Aquino.
Sinasabing ang may 120-square meter viewing deck na nakatayo sa tatlong natural rock formations ay hindi sakop ng nakuhang Forest Land Use Agreement for Tourism Purposes (FLAg-T) ng resort.
Ang resort’s FLAg-T lamang ay sumasakop sa 998 square meters sa Sitio Diniwid sa Brgy. Balabag hindi kasama ang viewing deck.
Ang hakbang ay bahagi ng pagtupad ng DENR sa utos ni Pangulong Rodrigo Duterte na solosyunan ang environmental problems sa Boracay sa loob ng anim na buwan.
Bagama’t humiling ng isang buwang palugit ang may-ari ng resort, isang araw lamang ang naibigay dito para mabigyang daan ang paglilipat ng mga guest dito.
Sinabi ni Environment and Natural Resources Secretary Roy Cimatu, magsisilbing huwaran sa ibang resort owners ang ginawa ni Aquino upang maipaalam sa lahat na dapat sundin ang batas hinggil dito.
Sinasabi ni Aquino na itinayo ang deck para sa mga guests na nais makita ang kagandahan ng Boracay sunset.
Nauna rito, binigyan ni Pangulong Rodrigo Duterte ng anim na buwan si Cimatu para sa rehabilitasyon ng Boracay.