NORTH COTABATO , Philippines — Bumulagta ang isang drug suspek makaraang manlaban sa mga operatiba ng pulisya habang arestado naman ang isa nitong kasama nang isilbi ang search warrant sa dalawang magkahiwalay na lugar sa Mlang, North Cotabato.
Kinilala ang nasawi na si Gerwin Macatubac Bualan, habang arestado naman si Ronald Binas Valenzuela na kapwa residente ng nasabing bayan.
Bukod sa dalawa ay target din ng operasyon ang dalawang mga suspek na nakatakas na sina David Pigkaulan at Ruel Macaso.
Ayon kay Police Chief Inspector Rolly Oranza, hepe ng Mlang PNP, sinalakay nila ang kabahayan ng apat na mga target ng search warrant alas-4:00 ng madaling araw nitong Lunes sa mga barangay ng Inas at Dalipe.
Nakuha sa pag-iingat ng mga suspek ang iba’t ibang piraso ng illegal na droga, mga granada, baril at sasakyang motorsiklo na ginagamit ng mga suspek sa kanilang kalakaran.
Ang operasyon ay isinagawa ng pinagsanib na pwersa ng PNP, mga elemento ng PIB, CPPO, EOD Team at iba’t ibang himpilan ng pulisya mula sa mga kalapit na bayan.