MANILA, Philippines — Nakapagbayad na ng mahigit P1-bilyon bilang bahagi ng refund ang kumpanyang Sanofi Pasteur para sa mga nalalabing Dengvaxia vaccines.
Kinumpirma kahapon ni Health Secretary Francisco Duque III na nakapagbigay na ng P1.16 bilyon ang Sanofi at may kasunod pang refund na ibibigay ang kumpanya sa Department of Health (DoH) para sa mga natirang stocks ng nasabing bakuna na kukunin sa Enero 22.
Gayunman, nilinaw ng kalihim na ang pag-refund ng Sanofi ay hindi nangangahulugan na tapos na ang kanilang imbestigasyon sa Sanofi dahil kailangan pa nilang tukuyin kung may mahalagang impormasyon na ikinubli kaugnay ng Dengvaxia.
Nauna nang nilinaw ng Sanofi sa isang statement na ang kanilang pagtugon sa hiling na reimbursement ng DoH ay walang kinalaman sa isyu ng kaligtasan o kalidad ng Dengvaxia.
Iginiit pa ng Sanofi na ang inabot ng isyu sa Dengvaxia ay bunsod ng hindi pagkakaunawaan sa benepisyo at panganib na kaakibat ng nasabing bakuna at kawalan din ng kamalayan ng publiko, partikular na ng mga magulang na nabakunahan ng Dengvaxia.
Para sa Sanofi, nananatili pa ring positibo ang pangkalahatang benepisyo ng dengue vaccination sa mga bansa na endemic o likas ang problema sa dengue gaya ng Pilipinas.