MANILA, Philippines — Inaasahang mas murang gulay ang mabibili ngayon sa Maynila sa panahon ng Kapaskuhan.
Ito naman ang tiniyak ni Manila Mayor Joseph Estrada kasabay ng pagpapasinaya ng Benguet vegetable market sa Quinta Market na dinaluhan ng mismong gobernador ng lalawigan na si Gov. Crescencio Pacalso at mga magsasaka nito.
Ayon kay Estrada, malaki ang maitutulong ng “farm direct” sa mga vendors dahil mas lalaki pa ang kanilang kita at mababawasan na ang mga middleman na siyang nagpapamahal ng gulay.
Ang lahat ng mga vendors ay maaaring umangkat sa Benguet vegetable market kung saan nakatitiyak na malinis at maganda ang kalidad ng mga gulay.
Binigyan diin naman ni Dax Gazmin, Chief Executive Officer ng farmdirect na ang pagbubukas ni Estrada ng oportunidad sa mga magsasaka ng Benguet ay indikasyon na sabay-sabay ang pag-unlad ng mga magsasaka at vendors ng mga gulay.