MANILA, Philippines — Kinumpirma ni Sen. Antonio Trillanes IV na nakipagpulong siya sa ilang opisyal ng Amerika ngunit nilinaw na hindi niya sinubukang harangin ang pagbisita sa bansa ni US President Donald Trump.
Sinabi ni Trillanes na hindi naman basta-basta mapipigilan ng tulad niya ang nakaplanong lakad ng US president.
"To be clear, I did not try to stop the state visit of President Trump since these things are carefully planned and cannot be stopped on the mere say so of a Philippine senator," pahayag ng senador.
Nakatakdang dumalo sa special gala celebration dinner ng 50th anibersaryo ng ASEAN si Trump sa Nobyembre 12.
Kabilang sa lakad ni Trump ang bilateral talks nila ni Pangulong Rodrigo Duterte.
Sinabi ni Trillanes na nakipagkita siya kay US Sen. Marco Rubio (R-Florida) upang pag-usapan ang relasyon ng Pilipinas at Amerika.
Natalakay din ang tungkol sa katiwalian at kalagayan ng karapatang pantao sa bansa.
Aniya pawang katotohanan lamang ang binanggit niya kay Rubio.
"Unlike the officials of the Duterte administration, I presented only factual information, Besides, you cannot fool the US government; they know what's happening in our country," banat ni Trillanes.
Sinabi ni Trillanes na para sa kapakanan ng bansa ang kaniyang ginawang pagbisita sa Amerika.
"But let me emphasize that the interests of our country are not necessarily the same as the interests of Mr. Duterte," dagdag ng senador.