MANILA, Philippines – Inihatid na sa kaniyang huling hantungan si University of Santo Tomas law student Horacio Castillo III ngayong Miyerkules ng hapon.
Inilibing ang mga labi ni Castillo sa Manila Memorial Park sa Parañaque City.
Bago nito ay idinaan muna siya sa Santuario de San Antonio Parish sa Makati City para sa isang misa.
Happening now: Funeral mass for hazing victim Horacio Castillo III at the Santuario de San Antonio Parish, Makati City. @PhilippineStar pic.twitter.com/s9qBsEzKS1
— Robertzon Ramirez (@iambertramirez) September 27, 2017
Pinaniniwalaang nasawi ang 22-anyos na Faculty of Civil Law student sa hazing ng Aegis Juris fraternity.
Isa sa mga suspek na si John Paul Solano ang sumuko na at itinuro ang kaniyang mga kasamahan sa grupo na nasa likod ng pagkasawi ni Castillo.
Sinabi ni Solano na wala siya noong initiation rites at tinawagan lamang siya upang tingnan ang noo’y nawalan ng malay na biktima.
Sinubukan pa aniya na i-revive si Castillo bago isinugod sa Chinese General Hospital.
Samantala, isa sa mga suspek na nakilalang si Ralph Trangia ang nakalabas na ng bansa.